Perdebedryf
Kaapse Premier Jaaroudveiling
Agri-Expo is gekontrakteer om die jaarlikse Kaapse Premier Jaaroudveiling van 27-28 Januarie in die Kaapstad Internasionale Konvensiesentrum (KIKS) aan te bied. Dit was die eerste keer ter wêreld dat ‘n jaaroud-veiling in die middel van ‘n groot stad aangebied is. Premier Helen Zille het hierdie toonaangewende geleentheid amptelik geopen.
Vier uitstallingslokale in die KIKS was gevul met 304 stalle, terwyl die veilingring en stalletjies in Lokaal 1 opgestel is. Internasionale volbloedagente en perde-eienaars het van regoor die wêreld gevlieg om die geleentheid by te woon. Die tydsberekening van die geleentheid het saamgeval met Kaapstad se grootste perderesies, die J&B Met, en gaste is bederf met ‘n 10-dag bonanza van die Kaap se wedrenwêreld.
Die finale totaal van die veiling was net onder R100 miljoen met die hoogste prys van R2 500 000 betaal vir twee hingsvullens. Die gemiddelde prys van die 290 jaarlinge was R404 205.
rondom die veilingring vergader
Kaapse Somer Jaaroudveiling
Die Kaapse Somer Jaaroudveiling is op 4 Maart by Sandringham aangebied. Slegs 154 jaarlinge was beskikbaar en die gemiddelde prys was R47 946, teenoor die R71 976 van die vorige jaar. Sandringham het homself as ‘n uitstekende en gewilde terrein vir hierdie veiling bewys.
Streeks Merrie-en-Speenlingveiling
Die Streeks Merrie-en-Speenlingveiling het op 26 Maart op Sandringham plaasgevind. Die katalogus het uit 217 merries bestaan wat ‘n goeie gemiddelde prys van R53 854 behaal het. Die totaal was R5 547 000. Hoewel dit gedurende die opbou-stadium swaar gereën het, was die dag van die veiling ‘n besonderse dag wat goed ondersteun is.
Kaapse Skouperd Vereniging
Die jaarlikse skou van die Kaapse Skouperd Vereniging is vanjaar vroeg in Januarie in Wetton aangebied. 200 van Agri-Expo se stalle is vir hierdie geleentheid opgeslaan, en die Genootskap het ook as borg opgetree. Die skou bestaan hoofsaaklik uit Walliese en Hackney ponies en is besonder goed deur die gemeenskap ondersteun.